ಶತಮಾನದ ಕೊನೆಯ ಶುಕ್ರ ಸಂಕ್ರಮ

ಶತಮಾನದ ಕೊನೆಯ ಶುಕ್ರ ಸಂಕ್ರಮ.

ಲೇಖನ-ಡಾ.ಲಿಂಗರಾಜ ರಾಮಾಪೂರ

ಶತಮಾನದ ಅಪರೂಪದ ಶುಕ್ರಸಂಕ್ರಮ ಜೂನ್ 6 ರಂದು ಸಂಭವಿಸಲಿದೆ. ಈ ಹಿಂದೆ 2004 ರಲ್ಲಿ ಶುಕ್ರಸಂಕ್ರಮ ಸಂಭವಿಸಿತ್ತು. ಮನುಷ್ಯ ಮೊದಲು ಶುಕ್ರಸಂಕ್ರಮವನ್ನು ಗಮನಿಸಿದ್ದು 1939 ರಲ್ಲಿ. ನಂತರ 1761-1769 ರಲ್ಲಿ 1874-1882, 2004-2012 ಹೀಗೆ ಶುಕ್ರಸಂಕ್ರಮ 2117 ರ ಡಿಸೆಂಬರ್ !!!. ಕಾರಣ ಶತಮಾನದ ಕೊನೆಯ ಶುಕ್ರಸಂಕ್ರಮ ಇದಾಗಿದ್ದು, ಮುಂದಿನ ಶುಕ್ರಸಂಕ್ರಮಕ್ಕಾಗಿ 115 ವರ್ಷ ಕಾಯಬೇಕು. ಶುಕ್ರಸಂಕ್ರಮ ಏನು ಎಂದು ಈ ವಿಶೇಷ ಲೇಖನ.

ಒಲವಿನ ದೇವತೆಯ ಸಂಕೇತವಾದ ಶುಕ್ರಗ್ರಹ ಹಾಗೂ ಪ್ರಖರವಾಗಿ ಹೊಳೆಯುವ ಸೂರ್ಯನಕ್ಷತ್ರದ ಮಹತ್ತರ ಕೂಟವೇ ಶುಕ್ರಸಂಕ್ರಮ. ಇದು ಖಗೋಳ ವಿಜ್ಞಾನದಲ್ಲಿ ಅಪೂರ್ವ ಘಟನೆ. ಈಗ ಬದುಕಿರುವವರಲ್ಲಿ ಯಾರೂ ನೋಡಿಲ್ಲದಂತಹ ಅಪರೂಪ ದೃಶ್ಯ. ಈ ರೀತಿಯ ಅನೇಕ ವಿಶೇಷಣಗಳಿಂದ ಕರೆಯಲ್ಪಡುವ ಘಟನೆಯೇ ಶುಕ್ರಸಂಕ್ರಮ. ಇದು ಜೂನ 8, 2004 ರಂದು ಸಂಭವಿಸಿತ್ತು. ಭಾರತದಾದ್ಯಂತ ಹಗಲಿನಲ್ಲಿ ಕಂಡು ಬಂದ ಈ ಘಟನೆಯನ್ನು ಖಗೋಳಾಸಕ್ತರು ವೀಕ್ಷಿಸಿದರು. ಮತ್ತೊಮ್ಮೆ ಇಂತಹದೇ ಘಟನೆಯನ್ನು ವೀಕ್ಷಿಸುವ ಅವಕಾಶ ಜೂನ್ 6, 2012 ಬುಧವಾರ ಬೆಳಿಗ್ಗೆ 7 ರಿಂದ 10:20 ರ ವರೆಗೆ ದೊರೆಯಿತು.

                ಅಂದು ಭೂಮಿ, ಶುಕ್ರ ಮತ್ತು ಸೂರ್ಯ ಒಂದೇ ಸರಳ ರೇಖೆಯಲ್ಲಿರುತ್ತವೆ. ಆಗ ಭೂಮಿಯ ಮೇಲಿರುವ ನಮಗೆ ಶುಕ್ರಗ್ರಹವು ಸೂರ್ಯನ ಮೇಲೆ ಹಾದೂ ಹೋಗುವ ದೃಶ್ಯ ಗೋಚರಿಸುವುದು. ಆಗಾಧ ಗಾತ್ರದ ಸೂರ್ಯನ ಜೊತೆ ಬೆಳ್ಳಿ ಚುಕ್ಕಿ ಒಂದು “ಕಪ್ಪು ಚುಕ್ಕೆ” ಯಂತೆ ಕಾಣುವುದು ಇಲ್ಲಿನ ವಿಶೇಷ.

ಈ ಘಟನೆ ನಡೆಯುವಾಗ ಶುಕ್ರಗ್ರಹದ ಗಾತ್ರ ಕೇವಲ ಒಂದು ಆರ್ಕ್‍ಮಿನಿಟ್. ಹೀಗಾಗಿ ಅಂದು ಸೂರ್ಯಗ್ರಹಣವಾಗುವುದಿಲ್ಲ. ಬದಲಿಗೆ ಕಪ್ಪು ಚುಕ್ಕೆಯೊಂದು, ಸೌರಕಲೆಯಂತೆ ಸೂರ್ಯಬಿಂಬದ ಒಂದು ಅಂಚಿನಿಂದ ಮತ್ತೊಂದರತ್ತ ಸಾಗುತ್ತದೆ. ಎಂಟು ವರ್ಷಗಳ ಹಿಂದೆ ನಮ್ಮ ದೇಶದಲ್ಲಿ ಸಂಪೂರ್ಣ ಸಂಕ್ರಮವನ್ನು ಆರುಗಂಟೆಗಳ ಕಾಲ ನೋಡುವ ಅವಕಾಶವಿತ್ತು.

                ವಿಶ್ವವಿಖ್ಯಾತ ಜರ್ಮನ್ ಭೌತ ವಿಜ್ಞಾನಿ ಕೆಪ್ಲರ್. ಇಂತಹ ಘಟನೆ ಡಿಸೆಂಬರ್ 6, 1631 ರಲ್ಲಿ ಸಂಭವಿಸಲಿದೆ ಎಂದು ಲೆಕ್ಕಹಾಕಿದ್ದ. ಘಟನೆ ಸಂಭವಿಸಿದಾಗ ಕೆಪ್ಲರ ಬದುಕಿರಲಿಲ್ಲ. ಸಂಕ್ರಮದ ಕೊನೆಯ ಹಂತ ಮುಂಜಾನೆ ಸೂರ್ಯೋದಯವಾದಾಗ ಸಂಭವಿಸಿತ್ತು. ಯುದ್ಧದಿಂದಾಗಿ ಯಾರೂ ಇದನ್ನು ನೋಡಲಿಲ್ಲ. ಪಿಯರೆ ಗಸೆಂಡಿ ಎಂಬ ಫ್ರೆಂಚ್ ವಿಜ್ಞಾನಿ ಪ್ಯಾರಿಸ್‍ನಲ್ಲಿ ಇದನ್ನು ನೋಡುವ ಪ್ರಯತ್ನ ಮಾಡಿದ್ದ.

                1639 ರಲ್ಲಿ ಸಂಭವಿಸಿದ ಶುಕ್ರ ಸಂಕ್ರಮ ಯಾರ ಗಮನಕ್ಕೂ ಬರಲೇ ಇಲ್ಲ. ಕೇಪ್ಲರ ಇದನ್ನು ಪೂರ್ವಭಾವಿಯಾಗಿ ತಿಳಿಸಿರಲಿಲ್ಲ. ಇಂಗ್ಲೆಂಡಿನಲ್ಲಿ ಮಾತ್ರ ಜೆರೇಮಿಯಾ ಹೋರಾಕ್ಸ್ ಎಂಬ ಖಗೋಳ ವಿಜ್ಞಾನಿ ಸ್ವತಂತ್ರವಾಗಿ ಸಂಕ್ರಮದ ದಿನವನ್ನು ಲೆಕ್ಕ ಹಾಕಿದ್ದ. 17ನೇ ಶತಮಾನದಲ್ಲಿ ಉಪೇಕ್ಷೆಗೊಳಗಾಗಿದ್ದ ಶುಕ್ರ ಸಂಕ್ರಮದ ವೀಕ್ಷಣೆ ಮತ್ತೆ ಪ್ರಾಮುಖ್ಯತೆ ಪಡೆದಿದ್ದು 18ನೇಯ ಶತಮಾನದಲ್ಲಿ. ಇಂಗ್ಲೀಷ್ ಖಗೋಳವಿಜ್ಞಾನಿ ಹ್ಯಾಲಿ. ಶುಕ್ರ ಸಂಕ್ರಮದ ಅಭ್ಯಾಸದಿಂದ ಖಗೋಳಮಾನ ಮತ್ತು ಸೂರ್ಯರ ನಡುವಿನ ದೂರವನ್ನು ಕಂಡುಹಿಡಿಯಬಹುದೆಂದು ಪ್ರತಿಪಾದಿಸಿದ.

                ಬುಧಗ್ರಹ ಸಂಕ್ರಮ ಆಗಾಗ್ಗೆ ಅಂದರೆ ಶತಮಾನದಲ್ಲಿ 13 ಸಾರಿ ಸಂಭವಿಸಿದರೂ ಅದರ ಲಂಬನ ತೀರಾ ಕಡಿಮೆ. ಸರಿಯಾಗಿ ಗೋಚರಿಸುವುದೂ ಇಲ್ಲ. ಹೀಗಾಗಿ ಹೆಚ್ಚು ಉಪಯೋಗವಿಲ್ಲ. ಶುಕ್ರ ಸಂಕ್ರಮ ತೀರಾ ವಿರಳ. ಮುಂದಿನ ಶುಕ್ರ ಸಂಕ್ರಮ 1761 ಮತ್ತು 1769ರಲ್ಲಿ ಸಂಭವಿಸಲಿದೆ ಎಂದು ಹ್ಯಾಲಿ ಲೆಕ್ಕಹಾಕಿದ್ದ. ಆದರೆ ಇವು ಸಂಭವಿಸಿದಾಗ ಹ್ಯಾಲಿ ಬದುಕಿರಲಿಲ್ಲ 1742 ರಲ್ಲಿ ಅಸುನಿಗಿದ್ದ.

ಸಂಕ್ರಮಗಳು ಬಂದು ಹೋದವು. 1761 ಮತ್ತು 1769ರಲ್ಲಿ ಸಂಗ್ರಹಿಸಿದ್ದ ಅಪಾರ ಮಾಹಿತಿಗಳನ್ನು ವಿಶ್ಲೇಷಿಸಿ ಲೆಕ್ಕಾಚಾರ ಮಾಡಲು 19 ನೇ ಶತಮಾನದವರೆಗೆ ಕಾಯಬೇಕಾಯಿತು. 1824ರಲ್ಲಿ ಯೋಹಾನ್ ಫ್ರಾನ್ಜ್ ಎನ್ಕೆ ಈ ಕಷ್ಟದ ಕೆಲಸಕ್ಕೆ ಕೈಹಾಕಿದ. ಬರ್ಲಿನ್ ವೇದಶಾಲೆಯ ನಿರ್ದೇಶಕನಾಗಿದ್ದ ಎನ್ಕೆ ಗ್ರಹದ ಲಂಬನವನ್ನು 8.5776 ಆರ್ಕ ಸೆಕೆಂಡ್ ಎಂದು ಲೆಕ್ಕಸಿದ. ಇದರಿಂದ ಒಂದು ಖಗೋಲಮಾನಕ್ಕೆ 153,340,000ಕಿ.ಮೀ ಎಂದು ತೀರ್ಮಾನಿಸಿದ. ಆ ಕಾಲಕ್ಕೆ ಇದು ಅತ್ಯತ್ತಮ ಲೆಕ್ಕಚಾರ. ಈ ಒಂದು ಖಗೋಳ ಮಾನಕ್ಕೆ 149,597,870 ಕಿ ಮೀ.

1874  ಮತ್ತು 1882ರಲ್ಲಿ ಸಂಭವಿಸಿದ ಶುಕ್ರ ಸಂಕ್ರಮವನ್ನು ವೀಕ್ಷಿಸುವುದು ಕಷ್ಟದ ಕೆಲಸವಾಗಲಿಲ್ಲ. ಆ ವೇಳೆಗಾಗಲೇ ಸಾಕಷ್ಟು ಅನುಭವ ಗಳಿಸಲಾಗಿತ್ತು. ಆಧುನಿಕ ಉಪಕರಣಗಳೂ ಲಭ್ಯವಾಗಿದ್ದವು. ನಕ್ಷತ್ರಗಳ ಛಾಯಾಚಿತ್ರ ತೆಗೆಯುವ ಅವಕಾಶ ಲಭ್ಯವಾಗಿತ್ತು. ದೂರದ ನಕ್ಷತ್ರ ಅಭಿಜಿತ್‍ನ ಲಂಬನವನ್ನು ಸ್ಟ್ರೊವಹ್ ಎಂಬ ಖಗೋಳವಿಜ್ಞಾನಿ ಕಂಡುಹಿಡಿದ. 1837ರಲ್ಲಿಯೇ ನಕ್ಷತ್ರದ ದೂರ 12.5 ಜ್ಯೋತಿವರ್ಷಗಳೆಂದು ಕಂಡುಹಿಡಿದ. ಇಪ್ಪತ್ತನೆಯ ಶತಮಾನದಲ್ಲಿ ಶುಕ್ರ ಸಂಕ್ರಮ ನಡೆಯಲ್ಲಿಲ್ಲ.

ಶುಕ್ರ ಸಂಕ್ರಮ – ಅಪರೂಪ ಏಕೆ?

ಒಂದು ವೇಳೆ ಶುಕ್ರ ಮತ್ತು ಭೂಮಿ ಸೂರ್ಯನಿರುವ ಸಮತಲ ಕಕ್ಷೆಯಲ್ಲಿ ಪರಿಭ್ರಮಿಸಿದ್ದರೆ ಸಂಕ್ರಮಗಳನ್ನು ಅನೇಕ ಬಾರಿ ನೋಡಬಹುದಾಗಿತ್ತು. ಆದರೆ ಶುಕ್ರ ಕಕ್ಷೆಯ ಭೂಕಕ್ಷೆಗೆ ಓರೆಯಾಗಿದೆ. ಹೀಗಾಗಿ ಪ್ರತಿ 16 ವರುಷಗಳಿಗೆ ಒಮ್ಮೆ ಶುಕ್ರಗ್ರಹವು ಭೂಮಿ ಮತ್ತು ಸೂರ್ಯರ ನಡುವೆ ಹಾದು ಹೋದರೂ ಸಂಕ್ರಮವಾಗುವದಿಲ್ಲ. ಹೀಗಾಗಿ ಅದು ಸೂರ್ಯ ಬಿಂಬದ ಮೇಲೆ ಅಥವಾ ಕೆಳಗಡೆ ಚಲಿಸುತ್ತಿರುತ್ತದೆ. ಸೂರ್ಯನ ಪ್ರಖರ ಬೆಳಕಿನಲ್ಲಿ ಗ್ರಹ ಗೋಚರಿಸುವುದಿಲ್ಲ.

                ಬುಧ ಕಕ್ಷೆಗೆ ಹೋಲಿಸಿದರೆ ಶುಕ್ರ ಕಕ್ಷೆ ಹೆಚ್ಚು ವೃತ್ತೀಯವಾಗಿದೆ. ಹೀಗಾಗಿ ಅದು ಭೂ ಕಕ್ಷೆಗೆ ಹೆಚ್ಚು ಓರೆಯಾಗಿಲ್ಲ. ಇದರ ಪರಿಣಾಮವಾಗಿ ಬುಧ ಸಂಕ್ರಮ  ಅಷ್ಟೇನೂ ವಿರಳವಲ್ಲ. 1907ರಿಂದ ಇಲ್ಲಿಯವರೆಗೂ 16 ಬುಧ ಸಂಕ್ರಮಗಳಾಗಿವೆ. ಮುಂದಿನದು ಮೇ 9, 2016ರಲ್ಲಿ ಬುಧನಿಗೆ ಹೋಲಿಸಿದರೆ ಶುಕ್ರ ಸಂಕ್ರಮ ನಿಜಕ್ಕೂ ವಿರಳ. ಕ್ರಿ.ಪೂ 2000 ರಿಂದ ಕ್ರಿ.ಪೂ 4000ರ ಅವಧಿಯಲ್ಲಿ ಕೇವಲ 81 ಶುಕ್ರ ಸಂಕ್ರಮಗಳಾಗಿವೆಯೆಂದು ಖಗೋಲ ವಿಜ್ಞಾನಿಗಳು ಲೆಕ್ಕ ಹಾಕಿದ್ದಾರೆ. ಇದಕ್ಕೆ ಕಾರಣ ಗ್ರಹದ ವೃತ್ತಿಯ ಕಕ್ಷೆ ಮತ್ತು ಅದರ ಕಕ್ಷೆಯ ಓರೆ ಕಡಿಮೆ ಇರುವುದೇ ಆಗಿದೆ. ಹೀಗಾಗಿ ಶುಕ್ರ ಸಂಕ್ರಮ ಎಂಟು ವರ್ಷಗಳ ಅಂತರದಲ್ಲಿ ಅಂದರೆ ಜೋಡಿಯಾಗಿ ಸಂಭವಿಸುವುದೇ ಅಲ್ಲದೇ (2004-2012) ಮುಂದಿನದು 105 ವರ್ಷಗಳ ನಂತರ ಸಂಭವಿಸಲಿದೆ (ಡಿಸೆಂಬರ್ 2117 ಮತ್ತು ಡಿಸೆಂಬರ್ 2125).

ಶುಕ್ರ ಸಂಕ್ರಮ ವೀಕ್ಷಣೆ ಹೇಗೆ?

ಸೂರ್ಯನ ಮೈಮೇಲೆ ಕಪ್ಪು ಚುಕ್ಕೆಯಾಗಿ ಚಲಿಸಲಿರುವ ಶುಕ್ರನನ್ನು ನೋಡಬೇಕೆಂದರೆ ಸೂರ್ಯನನ್ನೇ ನಾವು ನೋಡಬೇಕು. ಆದರೆ ಸೂರ್ಯನನ್ನು ಬರಿಗಣ್ಣಿನಲ್ಲಿ ನೋಡುವುದು ಅಪಾಯ! ಇದಕ್ಕೆ ಹಲವು ವಿಧಾನಗಳಿವೆ. ಕನ್ನಡಿ ಬಳಸಿ ಸೂರ್ಯ ಬಿಂಬವನ್ನು ಕತ್ತಲೆ ಕೋಣೆಯಲ್ಲಿ ಮೂಡಿಸಿ ನಿರ್ಭಯವಾಗಿ ವೀಕ್ಷಿಸಬಹುದು. ವೈಜ್ಞಾನಿಕವಾಗಿ ತಯಾರಿಸಲ್ಪಟ್ಟ “ಸೋಲಾರ ಫಿಲ್ಟರ್” ಕನ್ನಡಕದ ಮೂಲಕ ನೋಡಬಹುದು, ಅಥವಾ ಸೌರ ಫಿಲ್ಟರ್ ಆಳವಡಿಸಿರುವ ದೂರದರ್ಶಕದಿಂದ ನೋಡಬಹುದು.

ಕೊನೆ ಮಾತು:

                ಜಗತ್ತಿನೆಲ್ಲೆಡೆ ವಿಜ್ಞಾನಿಗಳು ಕಾತರದಿಂದ ಕಾಯುತ್ತಿರುವ ಶುಕ್ರ ಸಂಕ್ರಮದ ಆಧ್ಯಯನದಿಂದ ಭೂಮಿ ಸೂರ್ಯನ ನಡುವಿನ ದೂರವನ್ನು ಅಳೆಯಬಹುದು. ಶುಕ್ರ ಮತ್ತು ಸೂರ್ಯನಿಗಿರುವ ದೂರವನ್ನು ಲೆಕ್ಕ ಹಾಕಬಹುದು. ಸೌರಕಲೆಗಳ ಅಧ್ಯಯನ ಮುಂತಾದ ಖಗೋಳ ಸಂಬಂಧಿ ವೈಜ್ಞಾನಿಕ ಮಾಹಿತಿಗಳನ್ನು ಪಡೆಯಬಹುದಾಗಿದೆ.

                                ಮೇಲಿನದು ವಿಜ್ಞಾನಿಗಳ ಮಾತಾಯಿತು. ಇನ್ನೂ ನಾವು ನೀವೆಲ್ಲಾ ನೈಸರ್ಗಿಕವಾಗಿ ಫಟಿಸುವ ಖಗೋಳ ವಿಸ್ಮಯಗಳಿಗೆಲ್ಲಾ ಅಂಟಿಕೊಂಡಿರುವ ಮೂಢನಂಬಿಕೆಗಳನ್ನು ಭೇದಿಸಿ “ಶುಕ್ರ ಸಂಕ್ರಮ”ವನ್ನು ನೋಡುವ ಮೂಲಕ ಇದೊಂದು ಕೂತೂಹಲಕಾರಿ ವಿಸ್ಮಯಕಾರಿ ಮತ್ತು ಮನುಷ್ಯನ ಅರಿವನ್ನು ವಿಸ್ತರಿಸುವ ಘಟನೆ ಎಂಬುದನ್ನು ಸಾರೋಣ.

ಬಾಲಕಾರ್ಮಿಕತೆ, ಯಾವುದು ಸತ್ಯ? ಯಾವುದು ಮಿಥ್ಯ?

ಬಾಲಕಾರ್ಮಿಕತೆ, ಯಾವುದು ಸತ್ಯ? ಯಾವುದು ಮಿಥ್ಯ?

ಲೇಖನ: ಡಾ.ಲಿಂಗರಾಜ ರಾಮಾಪೂರ

----------------------------------------------------------------

ನಾವು ಉಪಯೋಗಿಸುವ ಬಟ್ಟೆಗಳು, ಆಭರಣಗಳು, ಅಲಂಕಾರಿಕ ವಸ್ತುಗಳು, ಟೀ ಮುಂತಾದವುಗಳನ್ನು ಹೆಚ್ಚಾಗಿ ಬಾಲಕಾರ್ಮಿಕರನ್ನೊಳಗೊಂಡು ತಯಾರಿಸಲ್ಪಟ್ಟ ವಸ್ತುಗಳಾಗಿವೆ. ಇಲ್ಲಿ 5 ವರ್ಷದಷ್ಟು ಕಡಿಮೆ ಪ್ರಾಯದ ಮಕ್ಕಳು ಇಡೀ ದಿವಸ ಅಪಾಯಕಾರಿ ಪರಿಸ್ಥಿತಿಯಲ್ಲಿ ತಮ್ಮ ಜೀವವನ್ನು ಅಪಾಯಕ್ಕೆ ಒಡ್ಡಿ ಕಡಿಮೆ ಸಂಬಳದ ಮೇಲೆ ರಕ್ತ ಸುರಿಸಿ ದುಡಿಯುತ್ತಿದ್ದಾರೆ. ಇವರಲ್ಲಿ ಹೆಚ್ಚಿನವರು ತಮ್ಮ ಕೆಲಸಕ್ಕೆ ದಾಸರಾಗಿದ್ದು, ಗುಲಾಮರಾಗಿ, ಜೀತದಾಳಾಗಿ ಕೆಲಸ ಮಾಡುತ್ತಿದ್ದಾರೆ. ಇವರಿಗೆ ಬಿಡುಗಡೆ ಅಥವಾ ಸ್ವಾತಂತ್ರ್ಯ ಕನಸಿನ ಗಂಟು.

                ಪ್ರಪಂಚದಾದ್ಯಂತ ಸುಮಾರು 211 ಮಿಲಿಯನ್ 6-14 ವರ್ಷದ ಮಕ್ಕಳು ಆರ್ಥಿಕ ಚಟುವಟಿಕೆಗಳಲ್ಲಿ ತೊಡಗಿರಬಹುದು ಎಂದು ಅಂದಾಜಿಸಲಾಗಿದೆ. 5-17 ವರ್ಷದ ಪ್ರಾಯದ ಮಕ್ಕಳಲ್ಲಿ ಆರ್ಥಿಕ ಚಟುವಟಿಕೆಗಳಲ್ಲಿ ತೊಡಗಿರುವುದು ಸುಮಾರು 352 ಮಿಲಿಯನ್ ಎಂದು ಅಂದಾಜಿಸಲಾಗಿದೆ.

                ಭಾರತದಲ್ಲಿ ಮಕ್ಕಳ ಸಂಖ್ಯೆ 398 ಮಿಲಿಯನ್ ಎಂದು ಅಂದಾಜಿಸಿದ್ದು ಅವರಲ್ಲಿ 203 ಮಿಲಿಯನ್ 5-14 ವರ್ಷ ವಯೋಮಿತಿಯವರು. ಇವರಲ್ಲಿ 116 ಮಿಲಿಯನ್ ಶಾಲೆಯಲ್ಲಿ ಇದ್ದಾರೆ. 12.6 ಮಿಲಿಯನ್ ಮಕ್ಕಳು ಪೂರ್ಣಾವಧಿಯ ಕೆಲಸಗಳಲ್ಲಿ ಇದ್ದಾರೆ. ಉಳಿದ 74 ಮಿಲಿಯನ್ ಮಕ್ಕಳ ಸ್ಥಿತಿಗತಿ ತಿಳಿದಿಲ್ಲ. ಇವರು ಕುಟುಂಬದ ಹೊಲಗದ್ದೆಗಳಲ್ಲಿ ಕೆಲಸ ಮಾಡುತ್ತಿರಬಹುದು ಅಥವಾ ತಮ್ಮ ಪೋಷಕರ ಜೊತೆಯಲ್ಲಿ, ಮನೆಗೆಲಸದವರಾಗಿ, ಜೀತದಾಳಾಗಿ ಅಥವಾ ಯಾವುದೇ ಕೆಲಸ ಮಾಡಿಕೊಂಡಿರಬಹುದು.

                ಬಾಲಕಾರ್ಮಿಕತೆಗೆ ಹಲವಾರು ಕಾರಣಗಳು ಇದ್ದರೂ ಅದರ ಬಗ್ಗೆ ಪ್ರಚಲಿತದಲ್ಲಿರುವ ಹಲವು ಕಟ್ಟುಕಥೆಗಳು, ಮಿಥ್ಯಗಳು ಹೀಗಿವೆ.

•             ಬಡತನವು ಬಾಲಕಾರ್ಮಿಕತೆಗೆ ಮುಖ್ಯ ಕಾರಣ.

ಬಡತನಕ್ಕೆ ಹಲವು ಆಯಾಮಗಳು ಮತ್ತು ಮುಖಗಳಿವೆ. ಕಡಿಮೆ ಸಂಪಾದನೆ, ಕಡಿಮೆ ಮಟ್ಟದ ಕೌಶಲ್ಯ ಮತ್ತು ಶಿಕ್ಷಣ, ಆಸ್ತಿ ಇಲ್ಲದೇ ಇರುವುದು. ತರಬೇತಿ ಮತ್ತು ಶಿಕ್ಷಣಕ್ಕೆ ಆಸ್ಪದ ಇಲ್ಲದಿರುವುದು. ಅನಾರೋಗ್ಯ, ಸರಿಯಾದ ಆಹಾರ ಮತ್ತು ಸೂರು ಇಲ್ಲದಿರುವುದು. ಆದರೆ ಇವು ಮುಖ್ಯ ಕಾರಣಗಳಲ್ಲ. ಪೋóಷಕರಿಗೆ ಮಕ್ಕಳನ್ನು ಶಾಲೆಗೆ ಕಳುಹಿಸಬೇಕು ಎಂಬ ಮನಸ್ಸು ಇದ್ದರೆ ಬಡತನ ಅಡ್ಡಿ ಆಗುವುದಿಲ್ಲ. ಅವರಿಗೆ ಕಷ್ಟವಾಗುವುದು ಆದರೆ ಅಸಾಧ್ಯವಾದುದಲ್ಲ.

•             ಮಕ್ಕಳು ಕೆಲಸ ಮಾಡದಿದ್ದರೆ ಅವರು ಮತ್ತು ಅವರ ಕುಟುಂಬಗಳು ಉಪವಾಸ ಇರಬೇಕಾಗುವುದು.

ಕುಟುಂಬದ ಎಲ್ಲಾ ಸದಸ್ಯರು ಮತ್ತು ಮಕ್ಕಳು ಕೆಲಸ ಮಾಡಿ ಸಹ ಉಪವಾಸ ಇರಬೇಕಾದ ಸಂಭವ ಇರುತ್ತದೆ. ಆಹಾರದ ಲಭ್ಯತೆ ಹಲವಾರು ವಿಚಾರಗಳ ಮೇಲೆ ಅವಲಂಬಿತವಾಗಿದೆ. ಉಪವಾಸ ಅಥವಾ ಆಹಾರದ ಅಲಭ್ಯತೆಯ ಹಲವಾರು ವಿಚಾರಗಳ ಮೇಲೆ ಅವಲಂಬಿತವಾಗಿದೆ. ಉಪವಾಸ ಅಥವಾ ಆಹಾರದ ಅಲಭ್ಯತೆಯ ಹಲವಾರು ವಿಷಯಗಳ ಸಮ್ಮಿಶ್ರವಾಗಿಯೇ ಅದು ಆಹಾರದ ಬೆಲೆ, ಜನರ ಆದಾಯ, ಕೊಳ್ಳುವ ಶಕ್ತಿ, ಆಹಾರದ ಲಭ್ಯತೆ, ಆಹಾರಕ್ಕೆ ಸಂಪರ್ಕ ಇತ್ಯಾದಿ ಅವಲಂಬಿಸಿದೆ.

•             ಬಡಜನರಿಗೆ ಹೆಚ್ಚು ಮಕ್ಕಳು ಇರುವುದು ಬಾಲಕರ್ಮಿಕತೆಗೆ ಕಾರಣ.

ಇದು ಸರಿಯಾದ ಮಾಹಿತಿ ಅಲ್ಲ. ದೇಶದ ಸಂಪತ್ತು ಅದರ ಜನಸಂಖ್ಯೆ, ಜನರಿಗೆ ಸರಿಯಾದ ಶಿಕ್ಷಣ ಕೊಟ್ಟು ಮತ್ತು ಅಭಿವೃದ್ಧಿ ಪಥ ತೋರಿಸಿದರೆ ಬಡಜನರ ಅಭಿವೃದ್ಧಿ ಸಾಧ್ಯ. ಅದರಿಂದ ದೇಶದ ಸಂಪತ್ತು ಹೆಚ್ಚಾಗುತ್ತದೆ. ನಾವು ಹೆಚ್ಚಾಗಿ ಸಂಖ್ಯೆಯನ್ನು ಗಮನಿಸುತ್ತೇವೆ ಆದರೆ ಈ ಸಂಖ್ಯೆಯಲ್ಲಿ ಇರುವ ಶಕ್ತಿಯನ್ನು ಗಮನಿಸುವುದಿಲ್ಲ.

•             ಪೋಷಕರು ತಮ್ಮ ಮಕ್ಕಳನ್ನು ಶಾಲೆಗೆ ಕಳುಹಿಸುವುದಕ್ಕಿಂತ ಕೆಲಸಕ್ಕೆ ಕಳುಹಿಸಲು ಇಷ್ಟಪಡುತ್ತಾರೆ.

ಇದು ತಪ್ಪು ಅಭಿಪ್ರಾಯ. ಸರ್ಕಾರೇತರ ಸಂಸ್ಥೆಗಳು ದೊಡ್ಡ ಸಂಖ್ಯೆಯಲ್ಲಿ ಮಕ್ಕಳನ್ನು ಕೆಲಸದಿಂದ ಬಿಡಿಸಿ ಶಾಲೆಗೆ ಸೇರಿಸಿರುವುದು ಇದಕ್ಕೆ ಸಾಕ್ಷಿ. ಸಾಮಾಜಿಕ ವ್ಯವಸ್ಥೆಯು ಪೋಷಕರು ಅವರ ಮಕ್ಕಳನ್ನು ಬಾಲಕಾರ್ಮಿಕತೆಗೆ ದೂಡುವಂತೆ ಪ್ರೋತ್ಸಾಹಿಸುತ್ತದೆ.

•             ಮಕ್ಕಳಿಗೆ ಕೆಲಸ ಮಾಡಲು ಆಸೆ ಇದೆ.

ಮಕ್ಕಳು ಕೆಲವೊಮ್ಮೆ ತಮಗೆ ಕೆಲಸ ಮಾಡಲು ಆಸಕ್ತಿ ಇದೆ ಎಂದು ತಿಳಿಸಬಹುದು. ಆದರೆ ಅವರಿಗೆ ಅದರ ಬದಲಿನ ಅವಕಾಶ ಗೊತ್ತಿಲ್ಲದೆ ಇರುವುದರಿಂದ ಅವರು ಕೆಲಸ ಮಾಡುತ್ತೇವೆಂಬುದಾಗಿ ಹೇಳುತ್ತಾರೆ. ಶಿಕ್ಷಣಕ್ಕೆ ಅವರಿಗೆ ಆಸ್ಪದ ಇಲ್ಲದೇ ಇರುವುದರಿಂದ ಶಾಲೆಯ ಪಾಠ ಪ್ರವಚನಗಳು ಅವರಿಗೆ ಆಸಕ್ತಿ ಮೂಡಿಸದೇ ಇರುವುದರಿಂದ ಹಾಗೂ ಶಾಲಾ ಶಿಕ್ಷಕರು ಕೆಲವೊಮ್ಮೆ ಇವರನ್ನು ಕಠೋರವಾಗಿ ನಡೆಸುವುದರಿಂದ ಮಕ್ಕಳ ಕೆಲಸ ಮಾಡಲು ಹೋಗುತ್ತಾರೆ.

•             ಮಕ್ಕಳನ್ನು ಅಪಾಯಕಾರಿ ಅಲ್ಲದ ಕೆಲಸಗಳಲ್ಲಿ ತೊಡಗಿಸುವುದರಿಂದ ಯಾವುದೇ ತಪ್ಪಿಲ್ಲ.

ಅಪಾಯಕಾರಿ ಎಂಬುದು ಚರ್ಚೆ ಮಾಡುವಂತಹ ವಿಚಾರ. ಯಾವುದೇ ಕೆಲಸವನ್ನು ಅನಾರೋಗ್ಯಕರ ಸನ್ನಿವೇಶದಲ್ಲಿ ಅಥವಾ ಹೆಚ್ಚು ಹೊತ್ತಿನವರೆಗೆ ಮಾಡಿದರೆ ಅದು ಅಪಾಯಕಾರಿಯಾಗಬಹುದು. ಮಕ್ಕಳಿಗೆ ಅವರ ಅಭಿವೃದ್ಧಿ, ಶಿಕ್ಷಣ. ಮನೋರಂಜನೆ, ವೈದ್ಯಕೀಯ ಸೌಲಭ್ಯ, ಆಟ ಇತ್ಯಾದಿಗಳಿಂದ ವಂಚಿತರನ್ನಾಗಿ ಮಾಡುವುದೂ ಕೂಡ ಅಪಾಯಕಾರಿ.

•             ಮಕ್ಕಳು ಕೆಲಸ ಮಾಡಿದರೆ ಅವರ ಕೌಶಲ್ಯ ಅಭಿವೃದ್ಧಿಯಾಗುತ್ತದೆ.

ಮಕ್ಕಳಿಗೆ ಕೊಡುವ ಕೆಲಸಗಳು ಸರಳ ಮತ್ತು ಪುನರಾವರ್ತನೆ ಆಗಿರುತ್ತದೆ. ಇದರಲ್ಲಿ ಯಾವುದೇ ಕೌಶಲ್ಯ ಇರುವುದಿಲ್ಲ. ಮಕ್ಕಳು ಈ ಕೆಲಸವನ್ನು ಬಹಳ ಹೊತ್ತಿನವರೆಗೆ ಅನಾರೋಗ್ಯಕರ ಸನ್ನಿವೇಶದಲ್ಲಿ ಮಾಡುತ್ತಾರೆ. ಕಷ್ಟಕರವಾದ ಭೌತಿಕ ಕೆಲಸ, ಧೂಳು, ಬೆಂಕಿ, ರಾಸಾಯನಿಕ ವಸ್ತುಗಳ ಸಂಪರ್ಕದಿಂದ ಮಕ್ಕಳ ಆರೋಗ್ಯ ಕೆಡುವುದೇ ಹೆಚ್ಚು.

•             ಸಾಂಪ್ರದಾಯಿಕ ಕಲೆ ಮತ್ತು ಕಸುಬನ್ನು ಕಾಪಾಡಲು ಮಕ್ಕಳು ಕೆಲಸ ಮಾಡಬೇಕು.

ಮಕ್ಕಳಿಗೆ ಅಂದರೆ ಬಾಲಕಾರ್ಮಿಕರಿಗೆ ಯಾರೂ ನಿಜವಾದ ಕಲೆ ಅಥವಾ ಕುಶಲ ಕೆಲಸವನ್ನು ಕಲಿಸಿ ಕೊಡುವುದಿಲ್ಲ. ಒಂದು ವೇಳೆ ಕುಟುಂಬದ ಕಲೆಗಳನ್ನು ಮಕ್ಕಳು ಕಲಿಯುವುದಿದ್ದರೆ ಅದು ಶಿಕ್ಷಣದ ಜೊತೆ ಆಗಬೇಕು.

•             ಮಕ್ಕಳು ವೇಗವಾಗಿ ಕೆಲಸ ಮಾಡುತ್ತಾರೆ. ಅವರ ಪುಟ್ಟ ಕೈಗಳು ನಾಜೂಕು ಆದ ಕೆಲಸ ಮಾಡಲು ಅವಶ್ಯಕ.

ಮಕ್ಕಳು ದೊಡ್ಡವರಿಗಿಂತ ಉತ್ತಮವಾಗಿ ಕೆಲಸ ಮಾಡುತ್ತಾರೆ ಎಂಬುದು ತಪ್ಪು ಕಲ್ಪನೆ. ಮಕ್ಕಳು ಯಾವುದೇ ಕಲ್ಪನೆಯಿಲ್ಲದೇ ಹೇಳಿಕೊಟ್ಟಿದ್ದನ್ನು ಮಾತ್ರ ಮಾಡಬಲ್ಲರು.

•             ಮಕ್ಕಳು ಕೆಲಸ ಮಾಡದೇ ಇದ್ದರೆ, ಕೈಗಾರಿಕೆ ಬಿದ್ದು ಹೋಗುತ್ತದೆ.

ಮಕ್ಕಳನ್ನು ಕೆಲಸಕ್ಕೆ ತೆಗೆದುಕೊಳ್ಳದಿದ್ದರೆ ಆಗುವ ವೆಚ್ಚದ ಹೆಚ್ಚಳ ಬಹಳ ಕಡಿಮೆ. ಇದನ್ನು ಕೈಗಾರಿಕೆ ಭರಿಸಲು ಆಸ್ಪದ ಇದೆ. ಅವರಿಗೆ ಲಾಭ ಸ್ವಲ್ಪ ಕಡಿಮೆ ಆಗಬಹುದು.

•             ಬಾಲಕಾರ್ಮಿಕತೆಯನ್ನು ನಿರ್ಮೂಲನೆ ಮಾಡಲು ಬಾಲಕಾರ್ಮಿಕತೆ ನಿಷೇಧ ಕಾನೂನುಗಳು ಸಾಕು.

ಬಾಲಕಾರ್ಮಿಕತೆಯ ನಿಷೇಧದ ಬಗ್ಗೆ ಕಾನೂನುಗಳು ಸಮಸ್ಯೆಗಳನ್ನು ಸಂಕೀರ್ಣಗೊಳಿಸಿ ಬಾಲಕಾರ್ಮಿಕತೆಯನ್ನು ಕಾನೂನುಬದ್ಧಗೊಳಿಸುವ ಸಂಭವ ಇದೆ. ಹಲವಾರು ಕಾನೂನುಗಳನ್ನು ಜಾರಿಗೊಳಿಸಿ ಅದನ್ನು ಅನುಷ್ಠಾನ ಮಾಡಲು ಕ್ರಮ ಕೈಗೊಳ್ಳದೇ ಹೋದರೆ ಏನೂ ಲಾಭವಾಗುವುದಿಲ್ಲ.

•             ಬಾಲಕಾರ್ಮಿಕತೆಯನ್ನು ತೊಡೆದು ಹಾಕಲು ಸಾಧ್ಯವಿಲ್ಲ.

ಈ ಬಗ್ಗೆ ಇರುವ ಕೆಲಸ ದೊಡ್ಡದು. ಆದರೆ ಸಾಧಿಸಲಾಗದ ಕಾರ್ಯವಲ್ಲ. ಇದು ಬೃಹತ್ ಕೆಲಸ ಅಥವಾ ಹೊರೆಯ ಕೆಲಸವಲ್ಲ. ಆ ಸಮಸ್ಯೆಯ ನಿವಾರಣೆಗೆ ಸಂಪನ್ಮೂಲದ ಕೊರತೆ ಅಲ್ಲ. ಆದರೆ ಕೊರತೆ ಇರುವುದು ನಿಜವಾದ ಆಸಕ್ತಿ ಮತ್ತು ರಾಜಕೀಯ ಇಚ್ಛಾಶಕ್ತಿ.

ಕೊನೆಯ ಮಾತು

                ಬಾಲಕಾರ್ಮಿಕತೆಯ ನಿರ್ಮೂಲನೆ ಯಾಂತ್ರಿಕ ಕ್ರಿಯೆಯಲ್ಲ. ಯಾಂತ್ರಿಕ ಕ್ರಿಯೆಯಾದರೆ ಸಾಧಿಸುವುದು ಸುಲಭ. ಆದರೆ ಇದು ಮಾನವರು ಮತ್ತು ಮಾನವರ ಯೋಜನೆಗೆ ಸಂಬಂಧಿಸಿದ್ದು. ಮಕ್ಕಳನ್ನು ನಾವು ಮನುಷ್ಯರನ್ನಾಗಿ ಕಾಣಬೇಕು. ಮಕ್ಕಳ ಹಕ್ಕುಗಳನ್ನು ಗುರುತಿಸುವ ಕಾಲ ಈಗ ಕೂಡಿಬಂದಿದೆ.